De vrinde van Manresa is eine vrindegroep dae al geruume tièd meidreit in de Venloose vasteloavend. Idder jaor opniej staeke weej de köp beejein, um waer as eine zoè bont meugelikke stoèt, op vasteloavesmaondaag mit d'n groeëte optoch, daor de binnestad te trekke. Meistal geit det gepaard met eine prachtige waage daobeej.

De vrinde van Manresa, zien lang geleeje ontstaon oèt eine groep enthousiaste leiders en leidsters van de scoutinggroep Manresa oèt Venlo-oës, maar haet in de laup der jaore eine haup nieje leeje meuge verwelkomme die neet vanoèt scouting komme. Mit z'ôn 25 man, en vrouw, sterk begint beej ôs ut vastelaovesblood al zoè rond juni/juli te kriebele, umdet we dan de ideeje veur ut nieje vasteloavesseizoen waer gaon bespraeke. Waat is ut thema? Waat wille we aan? Hoevuul wiele krieg de waage? Wie groeët wuurd de waage? Zoemaar wat vraoge die dan gaon speule.. Mit eine haup plaetjes en kleurkes geplek op eine kartonne bord probere de ideejegaevers ein kiekske te gaeve in eur ideej, en oetintellik wuurd d'r oèt allemaol die ideeje eine gekaoze.

En dan begint ut groeëte werk. De waage mot geteikend waere, de pakke oèt geteikend, sjablone môtte gemak waere, stof oètgezoch, sponsors môtte benaderd waere, materiale aangeschaf en neum maar op.

En dan vanoèt det kartonne velke met feutekes en kleurkes begint lanksaamaan alles te ontstaon. Idder jaor opniej is ôzze streefdatum um ein waek veur de vasteloavend met alles klaor te zien, maarja zoë as eine gooije vrindegroep betaamt is ut veural huul gezellig onder ein, waat d'r eigelik idder jaor opniej toe leidt det weej pas 's maondaags huul vruug in de ochtend, in de vreeskeld de letste hand legge aan de waage, en de letste puntjes op de i zette.

Zoè en noow is d'r genôg gekwazeld euver ôs. Ik zoèi zegge kièk ens röstig rond heej op dit digitaale huuske van ôs. Ut is nog neet gans klaor, maar iddere kièr zal d'r mièr te belaeve zien. Heb geej vraoge euver dit huuske stel ze dan gerös op Dit e-mailadres is beschermd tegen spambots. U heeft Javascript nodig om het te kunnen zien.

Mit vrintelikke groetjes,

d'n digitale kwazelaer!